Goierriko Hitza

Santuari diosala eginda agurtu dituzte festak olaberritarrek

Olaberria Tradizioz jantzitako ekitaldiak izan ziren atzo Olaberriko San Joan jaiak agurtzeko, santuaren egunean.

arkaitz apalategi

Lau eguneko festaren ondoren atzo agurtu zituzten San Joan jaiak Olaberrian. Eguraldia lagun, herritar ugarik parte hartu zuen santuaren eguneko ospakizunetan.

Goizetik hasita txistulariek festa giroa zabaldu zuten herrian zehar. Ondoren, tradizioa jarraituz, San Joan eguneko meza egin zuten, Olaberriko Zeba abesbatzak kantatua. Eguneko ekitaldirik jendetsuenetakoa hamaiketakoa izan zen. Udalak antolatuta, herritar guztiek mokadutxoa egiteko aukera izan zuten pilotalekuan. Ehundik gora lagun bildu ziren bertan. Arratsaldean, berriz, Gorritiren animaliekin gozatu zuten umeek. Eta eguna bukatzeko, herri kirol saioa izan zen plazan.

Tiro lehiaketa

Festak ofizialki atzo bukatu baziren ere, larunbat honetan Gipuzkoa mailako tiro lehiaketa jokatuko da Barruti zelaian, arratsaldeko lauretan hasita.